பிரவாகம்

~ அதிக  நாட்கள் விடுமுறையில் கழிந்தது  (5 மாதங்கள்)
~ இத்தனை வருஷத்துக்கும் சேர்த்து  ஒரே வருஷத்தில் நிறைய ஊசிகளும் மருந்து மாத்திரைகளும் சாப்பிட வைத்தது
~ மூன்று வருடங்களுக்கு மேல் ஓர் அலுவலகத்தில் வேலை பார்ப்பதில்லை என்ற கொள்கையை தகர்த்து வெற்றிகரமாய் 5-ம் ஆண்டாய் இந்த அலுவலகத்தில் தொடர்வது
~ சென்னையை விட்டு ஒரு நாள் கூட வெளியில் செல்லாதது
~ facebook அக்கவுண்ட்டை இழுத்து மூடியது
~ வீட்டில் சாப்பிடக்கூடாதுனு சொல்றதையெல்லாம் swiggy மூலம் திருட்டுத்தனமாய் அலுவலகத்தில் delivery வாங்கி சாப்பிட்டது
~ Zuka Cafe, Nasi and Mee, Chillies-னு புது இடங்களுக்கு போனாலும், Domino's, L'amandier, Cascade, Jonah's, Eden restaturant-னு வழக்கமா போற இடங்களுக்கும் அடிக்கடி போனது
~ 13 படங்கள் திரையரங்கில் பார்த்தது
~ 7 ஆண்டுகளுக்கு பின் கவிதாயினியை குடும்பத்துடன் சந்தித்தது & கே4கே அண்ணாச்சியையும் தீபா அண்ணியையும் சந்தித்தது
~ மகிழ்ச்சியின் மொத்த உருவாய் என் தேவதை 💕

என்று பல சுவாரஸ்யஙகளுடன் இனிதே நிறைவடைந்துள்ளது :)

காத்திருந்து பார்ப்போம் 2018 எப்படி இருக்கும்னு ;)

ஜனவரி - ஆகஸ்ட் 

இது மருத்துவமனை வருடம் - னு சொல்ற அளவுக்கு மருத்துவமனைக்கு சொத்தை எழுதி வைச்சாச்சு.. வருஷம் தொடங்குனதும் அப்பா ஒரு ஹெல்த் செக்கப் போயிட்டு வந்தாரு. ரிப்போர்ட் என்னவோ ஒன்னும் பிரச்சனை இல்லைனு தான் வந்துது. ஆனா அதுக்கப்புறம் தான் எல்லா பிரச்சனையும் ஆரம்பிச்சுது.. கண்ணுல, கால்லனு ஒன்னு மாத்தி ஒன்னு ஆரம்பிக்க கடைசில கிட்னில வந்து நின்னுச்சு. பயாப்சி பண்ணனும்னு ஆரம்பிச்சு அதுக்கு க்ரியாட்டின் அளவு கூடுதலா இருக்கு மொதல்ல அதை குறைங்கனு சொல்லி அதுக்கு டயாலிசிஸ் லொட்டு லொசுக்கு எல்லாம் பண்ணிட்டு கடைசில பயாப்சி பண்ணா உங்களுக்கு ஒன்னும் பிரச்சனை இல்லைனு சொல்லிட்டாங்க.. ஆனா அதை சொல்றதுக்கு அவங்களுக்கு 7 மாசம் ஆச்சு.

அப்பாவோட கதை தான் இப்படினா நானும் சங்கத்துல சேந்துக்கறேன்னு வீட்டுக்காரர் கால்ல பிரச்சனைனு அவரும் வந்து மருத்துவமனைல படுத்துக்கிட்டாரு. மாமனாரும் மருமகனும் பக்கத்து பக்கத்து மருத்துவமனைல இருக்க நானும் எங்கம்மாவும் 2 மருத்துவமனைக்கும் அலைஞ்சது இன்னிக்கு நினைச்சாலும் பகீர்ங்குது. இதுல கொடுமை என்னன்னா.. எனக்கு மருத்துவமனைன்னாலே கொஞ்சம் அலர்ஜி.. அப்படியாப்பட்ட என்னை வீட்டு பக்கமே எட்டிப்பாக்காம இராப்பகலா மருத்துவமனைலயே ஒரு வாரம் இருக்க வைச்சது இந்த வருஷம் தான்.

அந்த நேரத்துல வந்து யாராவது என்கிட்ட இந்த வருஷம் உனக்கு எப்படி இருந்துச்சுனு கேட்டிருந்தா சத்தியமா இந்த வருஷத்த என் வாழ்க்கைல இருந்து அழிச்சிடுங்கனு சொல்லியிருப்பேன். அவ்வளாவு கொடுமையா இருந்துது.. இதையும் நான் கடந்து வந்திருக்கேன்னு இன்னமும் என்னால நம்ப முடியலை !!

செப்டம்பர் - டிசம்பர்

இந்த புள்ளைய ரொம்ப படுத்தி எடுத்துட்டோம் பாவம்னு கடவுளுக்கே மனசு கஷ்டமாயிடுச்சோ என்னவோ.. பல நாள் ஆசைப்பட்டதை இந்த மூனு மாசத்துல அள்ளி தந்துட்டாரு. அப்படி தந்த விஷயங்கள்

1. Girls only outing - ஒன்று அல்ல இரண்டு முறை.. மொத்தம் 8 நாட்கள் செம ஆட்டம்
2.  குற்றால அருவி குளியல். குளிச்சிட்டு வந்து அங்க இருந்த கடைகள்ல பஜ்ஜி, அண்ணாச்சி பழம், பதனினு எல்லாத்தையும் ஒரு ரவுண்ட் கட்டினது
3. கோவா பயணம்
4. பல வருஷம் கழிச்சு ப்ளாக்கர் சந்திப்பு - தங்கச்சிக்கா அனு-வை சந்தித்தது
5. ஆன்சைட்டில் இருந்து கிளையண்ட் வந்ததால் 2 வாரங்கள் தினமும் அவரை மதிய சாப்பாட்டிற்கு ஒவ்வொரு ஹோட்டலாக கூட்டி சென்று கம்பெனி சொத்தை அழித்தது. தலைப்பாகட்டி முதல் GRT Temple Bay வரை ஒரு ஹோட்டலையும் விட்டு வைக்கலை - அதுவும் புரட்டாசி மாசம் இப்படி தினமும் அசைவ சாப்பாடா சாப்டேன்னு மாமியாருக்கு தெரிஞ்சா நான் செத்தேன் ;-0

இப்படி இன்னும் சிலபல விஷயங்கள் நடந்தன. அதையெல்லாம் சபையில் சுயவாக்குமூலமாக வைக்க விரும்பாத்ததால் இந்த பதிவை இங்கேயே நிறுத்திக்கொள்கிறேன் :-P

ஆகமொத்தத்தில் இந்த வருடம் துன்பத்தில் துடங்கி இன்பத்தில் நிறைவடைந்துள்ளது.. இந்த புன்னகையுடனே அடுத்த வருடத்தை வரவேற்க நான் தயாராகிட்டேன் :-)

உங்கள் அனைவருக்கும் இனிய புத்தாண்டு வாழ்த்துக்கள் :-)

மாசா மாசம் Full day powershut down = எங்கள் Outing day. இந்த மாசமும் அதுக்கு விதிவிலக்கு இல்ல. காலைல 9 மணிக்கு டான்னு கிளம்பி (மின்சாரம் கட் ஆகறதுக்குள்ள கிளம்பனுமில்ல ;)) நேரா EA போனோம். A Good Day to Die Hard படம். படம் ஆரம்பிக்கறதுக்கு முன்னாடி வந்த Dolby Atmos Sound effect விளம்பரம் செம டாப். படம் ஓகே ரகம் தான். ஒரு வாட்டி பாக்கலாம். படம் முடிஞ்சதும் அடுத்து நாங்க போனது ஜெமினி சர்க்கஸ்க்கு

ரொம்ப நாள் (வருஷம்) ஆச்சே சர்க்கஸ் எல்லாம் போய்.. எப்படி தான் இருக்குனு போய் பாப்போம்னு போனது தான்..  2 மணி நேரம் நல்லாவே பொழுது போச்சு. ஆனா ப்ரோக்ராம் முழுக்க ஒரு பயத்தோடவே உட்கார்ந்திருந்தோம்.. போட்டிருந்த ப்ளாஸ்டிக் இருக்கை அம்புட்டு வீக்கு. அதுக்கு உதவி செய்ற மாதிரி தரை வெறும் கல்லும் மண்ணுமா கிடந்துது். உட்கார்ந்திருக்கற இருக்கை நம்ம வெயிட் தாங்காம வளையுதா இல்ல மண்ணுல புதையுதானு புரியாமலே இது உடைஞ்சுடுமோன்னு கொஞ்சம் பயத்தோடவே உட்கார்ந்திருந்தோம்.. கடல் தண்ணில நிக்கறப்போ ஒரு 5 நிமிஷம் ஒரே இடத்துல நின்னா நம்ம கால் மண்ணுல புதைஞ்சிடும். கொஞ்ச நேரத்துல ஒரு அடி முன்னாடியோ இல்ல சைட்லயோ நகர்ந்து நிப்போம்.. அது மாதிரி இருக்கை மண்ணுல புதைய புதைய ஒரு அரை மணி நேரத்துக்கு ஒரு தரம் கொஞ்சம் கொஞ்சமா நகர்த்தி நகர்த்தி உட்கார்ந்தோம் :-(

ரொம்பவும் பிடித்த நிகழ்ச்சிகள்னு பாத்தா
1. Girls Cycling - செமையா இருந்துச்சு.
2. Hanging Balance - அவ்வ்... வாய்லயே கயிரை புடிச்சிக்குட்டி பம்பரம் மாதிரி சுத்தறாங்க..
3. Birds show - வூட்டுக்காரருக்கு புடிச்சிருந்துதுனு சொன்னாரு.. நான் அப்போ ஐஸ்க்ரீம் சாப்பிடறதுல பிஸியா இருந்துட்டேன். சரியா கவனிக்கலை
4. Buffoon acts - என்னத்த புதுசா செஞ்சிடப்போறாங்கனு நினைச்சோம்.. ஆனா நிஜமாவே வாய் விட்டு சிரிச்சோம்.. எத்தனை வருஷம் போனாலும் இவங்க மவுசு மட்டும் குறையவே குறையாது போல :-)
5. இது பேரு மறந்துடுச்சு. ரவுண்டா ஒரு உருள்ற ஐட்டம் வைச்சு அதுக்கு மேல சிலதை வச்சு அது மேல ஏறி நின்னு பேலன்ஸ் பண்ணி அதுல நின்னுட்டே வளையத்த போடுறதும் கழட்டறதும்..செஞ்சவருக்கு நிஜமாவே திறமை ஜாஸ்தி தான்.

பிடிக்காத நிகழ்ச்சிகள்
1. மோட்டார் பைக் - ஸப்பா எவ்ளோ சத்தம் :-( காது கிழிஞ்சிடுச்சு
2. ஒட்டகம் - கூட்டிட்டு வந்து நாற்காலி மேல 2 கால் வைக்க வைச்சாங்க.. ஆனா அதுக்கே அந்த ஒட்டகம் எவ்ளோ அடி வாங்குச்சு :-(

ஆனாலும் Best of the lot-னா அது நாய்கள் வந்த ஷோ தான்.. சில நாய்கள் சொன்னதை செஞ்சாலும் ஒன்னு ரெண்டு நீ என்ன சொல்றது நான் என்ன கேக்கறதுங்கற ஸ்டைல்ல நடந்துக்கிட்டது டாப்... முக்கியமா சறுக்கு மரம்.. 4 நாய்கள்ல 3 கரெக்டா செஞ்சிட ஒரு நாய் மட்டும் படிக்கட்டு ஏறிட்டு மறுபடி படிக்கட்டு வழியாவே இறங்கிடுச்சு.. ஒரு வாட்டி 2 வாட்டி இல்ல.. 3 வாட்டி.. அதுக்குப்புறமும் அதை கஷ்டப்படுத்த வேணாம்னு திருப்பி கூட்டிட்டு போய்ட்டாங்க :)

இப்படியாக சர்க்கஸ் நிகழ்ச்சி முடிஞ்சப்புறம் பொருட்காட்சிக்கு போனோம்.. நாங்க போனது முக்கியமா அந்த பெரிய டில்லி அப்பளம் சாப்பிட + கொஞ்சம் ஷாப்பிங் பண்ண.. ரெண்டு வேலையையும் கரெக்டா முடிச்சுட்டு டான்னு 6 மணிக்கு வீட்டுக்கு வந்துட்டோம்.